Ҫӗнӗ Шупашкарти Терешкова урамӗнчи киоскра спиртлӑ шӗвек сутнӑ. Кун пирки йӗрке хуралҫисене пӗр арҫын утӑ уйӑхӗн 3-мӗшӗнче систернӗ.
Киоскра ӗҫлекен 42 ҫулти хӗрарӑм-сутуҫӑ лосьон тесе ҫырса хунӑ шӗвеке сутнӑ. Унта спирт виҫи 95 процент пулнӑ. Шӗвеке 100 миллилитр кӗрекен кӗленчепе ярӑнтарнӑ.
Вырӑна йӗрке хуралҫисем пырса ҫитнӗ. Вӗсем унта спиртлӑ шӗвек сутнине ҫирӗплетсе панӑ. Тӗрӗслев материалӗсене Роспотребнадзорӑн Чӑваш Енри управленине ярса панӑ.
Алкоголь сутасси ҫинчен калакан саккуна пӑснӑ хӗрарӑма административлӑ майпа явап тыттарӗҫ.
"Лиза Алерт" хастарӗсем пульницӑран тухса тарнӑ 2 ҫынна шыранӑ.
Утӑн 3-мӗшӗнче Ҫӗнӗ Шупашкарта 79-ти пациент тухса тарнӑ. Утӑн 4-мӗшӗнче Шупашкарти пульницӑран 56 ҫулти арҫын тухса кайни пирки пӗлтернӗ.
Ҫӗнӗ Шупашкарти арҫынна урамра пӗлӗшӗсемех асӑрханӑ та киле илсе кайнӑ. Вӑл тупӑнсан хастарсем Шупашкарти арҫынна ҫине тӑрсах шыранӑ. Ӑна таксист ӑнсӑртран асӑрханӑ та киле илсе ҫитернӗ.
Иртнӗ талӑкра республикӑра икӗ пушар пулнӑ. Иккӗшӗ те - Ҫӗнӗ Шупашкарта.
Утӑ уйӑхӗн 3-мӗшӗнче 18 сехетре Хӗвелтухӑҫ урамӗнчи 11-мӗш ҫуртра виҫӗ пӳлӗмлӗ хваттер ҫуннӑ. Тӗтӗм тухнине иртен-ҫӳрен асӑрханӑ. Ҫулӑм сӗтел-пукана тӗп тунӑ, шалти отделкӑна сиенлетнӗ. Кил хуҫи, 45 ҫулти арҫын, ҫунса вилнӗ. Вӑл пирусне сӳнтермесӗрех ҫывӑрма выртнӑ.
Ҫур сехетрен Интернационалист салтаксен урамӗнчи пӗр пӳлӗмлӗ хваттер ҫунма тытӑннӑ. Унта та пирус тӗпне сӳнтерменнипе ҫулӑм тухнӑ. Юрать-ха, кил хуҫи хӑй шар курман. Вырӑн ҫивитти ҫеҫ ҫуннӑ.
Ҫӗнӗ Шупашкарти таксист патне саккас килнӗ: йӗрке хуралӗн ведомстви патне апат-ҫимӗҫ тата эрех-сӑра илсе килмелле-мӗн. Кунсӑр пуҫне ӑна телефон номерӗ ҫине 10 пин тенкӗ хума каланӑ. 23-ри таксист хушнине пурнӑҫланӑ.
Анчах каланӑ адреспа ҫитнӗ, ҫав телефон номерӗпе шӑнкӑравланӑ та - ӑна вара сӳнтернӗ. Учреждени ӗҫченӗсем вара унашкал нимӗнле саккас та туманнине каланӑ.
Ҫавнашкал саккасах 25-ри каччӑ йышӑннӑ, вӑл та ҫав телефон номерӗ ҫинех укҫа хунӑ.
Халӗ йӗрке хуралҫисем ӗҫ-пуҫа уҫӑмлатаҫҫӗ.
Чӑваш Енре тепӗр ҫамрӑк Патшалӑхӑн пӗрлехи экзаменӗсенче 2 предметпа 200 балл пухнӑ. Кун пирки ЧР Вӗренӳ министерстви пӗлтерет.
Вӑл Ҫӗнӗ Шупашкарти 18-мӗш лицейра ӑс пухакан Мария Пульхеровская. Мария биологипе тата химипе экзамен тытса иккӗшӗнпе те 100-шер балл пухнӑ.
Аса илтерер: ун пек тепӗр маттур хӗр – Екатерина Ейкова. Шупашкарти 2-мӗш лицейра ӑс пухнӑскер вырӑс чӗлхипе тата химипе 100-шер балл пухнӑ.
Ҫӗртме уйӑхӗн 24-мӗшӗнче каҫхине Атӑлӑн сулахай енчи ҫыранӗнче, Ҫӗнӗ Шупашкара хирӗҫле, 46 ҫулти арҫын путса вилнӗ.
Инкеклӗ лару-тӑру министерстви пӗлтернӗ тӑрӑх, арҫын ӳсӗр пулнӑ, вӑл юраман ҫӗрте шыва кӗнӗ. Унӑн виллине шывран ҫӑлавҫӑсем кӑларнӑ.
Аса илтерер: ҫав кунах Атӑлта 14 ҫулти арҫын ача путса вилнӗ. Ҫулталӑк пуҫланнӑранпа республикӑра шывра 16 ҫыннӑн пурнӑҫӗ татӑлнӑ.
Чӑваш Енӗн юн резерв фондӗнчен 80 миллион тенке яхӑн уйӑрнӑ. Ку укҫапа Шупашкарти тата Ҫӗнӗ Шупашкарти троллейбус управленийӗсем электроэнергишӗн пухӑннӑ парӑма татӗҫ.
76 млн та 400 пин тенки Шупашкара кайӗ, 3 млн та 500 пин тенки - Ҫӗнӗ Шупашкара. Сӑмах май, квартал пӗтӗмлетӗвӗпе килӗшӳллӗн, Шупашкарти троллейбус управленийӗ электроэнергишӗн 73 млн та 400 пин тенкӗ парӑма кӗнӗ
Историпе пулнӑ патшалӑхӑн пӗрлехи экзамӗнӗн петӗмлетӗвӗ паллӑ. Ку предметпа камсем 100 балл пухнине пӗлтернӗ.
Пӗтӗмпе икӗ ҫамрӑк чи нумай балл пухнӑ. Пӗри – Ҫӗнӗ Шупашкарти 8-мӗш шкулти Анжела Романова. Тепри – Шупашкарти 5-мӗш гимназинчен вӗренсе тухнӑ Елена Бобрикова.
Сӑмах май, унччен химипе тата вырӑс чӗлхипе 100 балл пухнӑ 11 яш-хӗр пирки хыпарланӑччӗ.
Ҫӗртме уйӑхӗн 18-мӗшӗнче 17 сехет те 10 минутра ҫӑлав службине васкавлӑ хыпар ҫитнӗ: Ҫӗнӗ Шупашкарти чиркӗве арҫын кӗнӗ те хӑйӗн ҫумӗнче бомба пурри пирки пӗлтернӗ.
Ҫӑлавҫӑсем Интернационалист-салтаксен урамӗнче вырнаҫнӑ чиркӗве хӑвӑртах ҫитнӗ. Арҫын ҫумӗнче нимӗнле бомба та тупман.
Чӑваш Республикинчи ҫӑлавпа шырав служби хыпарланӑ тӑрӑх, ҫав арҫынна полици машинине лартса унпа психологи калаҫӑвӗ ирттернӗ.
Ҫӗртме уйӑхӗн 16-мӗшӗнче 16 сехет те 40 минутра Шупашкарти «Ҫӗнӗ хула» микрорайонта пурӑнакан 36-ри хӗрарӑм 6 ҫулти ывӑлӗ ҫухални пирки полицие пӗлтернӗ. Пӗчӗкскер аслисенчен ирӗк ыйтмасӑр урама тухнӑ та самокатпа ярӑннӑ. Хайхискер «Вятка» ҫулпа пынӑ та пынӑ… Ача ҫур сехет ҫапла ярӑннӑ. Ӑна ҪҪХПИ ӗҫченӗсем асӑрханӑ. Ҫав вӑхӑт тӗлне амӑшӗ сехӗрленсе ӳкнӗ ӗнтӗ, ӑна шыранӑ.
Арҫын ачана Ҫӗнӗ Шупашкара кӗнӗ ҫӗрти постра тӑракан Андрей Ильин асӑрханӑ. Полицейскисем ачана поста илсе килсе чей ӗҫтернӗ, мультик ярса панӑ.
Микрорайонтан спутник хулана ҫитиччен пӗр водитель те чарӑнса ача пӗччен ӑҫта кайни пирки кӑсӑкланман.
+32.3 °C